Inlibak ni Department of Justice Jesus Crispin ‘Boying’ Remulla iti alegasyon a ‘disqualified’ isuna iti aplikasyon para ti pagka-Ombudsman.
Daytoy ket kasaruno iti isyu online a mangibingbinglay a diniskwalipika ti Judicial and Bar Council iti aplikasyon na, ngem kenunana a saan nga umiso iti nasao nga impormasyon.
Segun kenni Justice Secretary Remulla, saan nga ‘accurate’ iti maiwarwaras a report kadagiti social media platforms a nadisqualified isuna gapu iti ‘pending case’ na iti Office of the Ombudsman.
Maipalagip nga pinilaan isuna iti reklamo ni Senator Imee Marcos ti panaglabsing iti Anti- graft and Corrupt Practices Act, Arbitrary Detention, Usurpation of Judicial Functions, Grave Misconduct ken sabali pay a kaso mainaig iti panaka-arestar ni sigud a Presidente Duterte.
Inlawlawag met iti Korte Suprema a saan pay a pinal iti opisyal a listaan ti Judicial and Bar Council kadagiti agap-apply ti posisyon a pagka-Ombudsman.
Maipalagip a nabakante iti nasao a posisyon gapu iti panagretiro ni sigud nga Ombudsman Samuel Martires.
No mapili ni Secretary Jesus Crispin Remulla kas Ombudsman, ibati na iti agdama a posisyon na a kas sekretaryo ti Department of Justice.
