LA UNION – Inaprubaran ti South Korea iti aganay $500,000 wenno kaibatugan ti nasurok P29 million a tulong para kadagiti biktima ti nagsasaruno a bagyo ditoy Pilipinas.
Iti nasao a tulong ket maidalan babaen ti World Food Programme (WFP).
Segun iti Korean Embassy, mausar ti nasao a pondo para iti recovery wenno panagbangon dagiti residente kadagiti lugar a nakaru a dinuprak ti nagsasaruno a bagyo.
Kangrunaaan a pakailatangan ket iti relief distribution kadagiti apektado a lugar.
Maipalagip nga iti uneg laeng ti sumagmamano a lawas ket tallo a nagsasaruno a bagyo ti dimmuprak ditoy pagilian ken milyon a residente iti naapektaran.
