LA UNION – Inaresto dagiti pulis idiay South Korea ni sigud a Defense Minister Kim Yong-hyun ita nga aldaw ti Domingo gapu iti maipagarop a nagbalin a papel na iti apagbiit a panangideklara ni President Yoon Suk Yeol ti martial law.
Maibilang ni Kim a kangrunaan a personalidad iti apagbiit a deklarasyon ti martial law idi Martes.
Naglosolos metten daytoy kas ministro ti depensa.
Rinugyan dagiti pulis ti imbestigasyon kenni Kim, pakairamanan da Yoon ken martial law commander Park An-su, gapu iti maipagarup nga insurrection.
Rinaut pay dagiti pulis iti pagtaengan ni Kim ken impasidong da isuna iti travel ban.
Kabayatanna, nalasatan ni Yoon iti impeachment vote idiay parliament idi rabii ti Sabado.
Kasapolan ngamin ti impeachment motion iti at least two-thirds wenno 200 kadagiti 300-seat iti South Korean National Assembly tapno ma-impeach ti Presidente.
Ngem saan a nagballaygi ti impeachment vote gaputi panang-boyccot ti Partido ni Yoon a People Power Party (PPP).
Segun iti PPP, linapdan da iti mosyon iti tarigagay da a maliklikan iti panagsisina ken posibilidad a kumaru pay ti riribok iti nasao a pagilian.
Kabayatanna, tallo a minority opposition parties iti nangipila ti reklamo a treason kadwa ti prosekusyon kontra kada President Yoon Suk Yeol, Ex-Defense Minister Kim Yong-hyun, ken martial law commander An-su.
Im-imbestigaran metten dagiti national police ti ‘claims of treason’ maikontra ken Yoon ken dagiti nangangato a ministro.
