Nagyaman ni House Speaker Ferdinand Martin Romualdez ni Presidente Ferdinand Marcos Junior ken ti administrasion gapu iti panagregget a nagresulta iti natalged a pannakairuar ti 17 a Filipino seafarers a hinostage dagiti rebelde a Houthi idiay Yemen iti 429 nga aldaw.
Inyebkas ni Speaker Romualdez ti panakipamaysa na kadagiti pamilia dagiti tripulante, ken panangbigbigna iti kinaandur ken kinatibker da iti tengnga ti nakaro a pannubok.
Nupay kasta, impaganetget ni Speaker Romualdez ti kinapateg ti agtultuloy a panangpapigsa kadagiti polisia a mangsalaknib iti pagimbagan dagiti Overseas Filipino Workers (OFWs).
Dinakamat pay ti mammanday-linteg ti pannakaipaulog ti Republic Act 12021 wenno ti Magna Carta of Filipino Seafarers, a kunana a napateg nga addang tapno masigurado ti karbengan, kinatalged, ken gundaway dagiti propesional a Pilipino iti maritime industry.
Nakipamaysa pay ni Speaker Romualdez kenni Presidente Marcos a nangiyebkas iti panagyaman kenni His Majesty Haitham bin Tarik, Sultan of Oman, agraman ti gobierno ti Oman, ken dadduma pay nga organisasion a timmulong iti negosasion a nagresulta iti pannakawayawaya dagiti marino.
