Inawagan ni Speaker Ferdinand Martin Romualdez dagiti 67 million a Filipino voters nga agbalinda a kritikal ken nasiput iti panagpili kadagiti kandidato a butosanda inton 2025 mid-term elections, tapno maliklikan ti pannakaikabil manen ti maysa nga “Alice Guo”.
Inaramid ni Speaker Romualdez ti nasao a statement iti baet ti agtultuloy a panangawat ti Commission on Elections (Comelec) kadagiti certificates of candidacy dagiti agkandidato iti masungad nga eleksion.
Segun iti Speaker, ti kaso ti naikkat a mayor ti Bamban, Tarlac a ni Alice Guo ket rumbeng nga agserbi a palagip kadagiti botante nga agbalinda a kritikal ken nasiput tapno saan manen a mapasamak daytoy.
Maysa a Chinese national ni Guo a nagusar kadagiti peke a dokumento tapno agparang a Pilipino ken tapno makagun-od iti puwesto ti gobierno.
Immapela pay ni Speaker Romualdez iti Comelec nga indauluan ni Chairman George Garcia nga uray no maibilang a “ministerial in nature” ti pannakaproseso dagiti certificates of candidacies (COCs), napateg latta a siguraduen ti opisina a ti integridad ti proseso ti eleksion.
