LA UNION – Nalidem a mangisayangkat iti special election tapno sukatan ni Senador Sonny Angara iti nabakante a puestona no agtugaw daytoi kas sekretario ti Department of Education.
Daytoy ket kalpasan a dinutokan ni Presidente Ferdinand Marcos Jr. ni Sen Angara kas baro nga education secretary kalpasan a nagikkat ni VP Sara Duterte iti puesto ti Gabinete idi Hunio 19.
Inlawlawag ni Comelec Chairman George Garcia, ababa laengen ti oras ken maysa laeng a tawenen ti termino ni Angara.
Kinuna pay ti poll body chief a P13 billion ti kasapulan tapno maisayangkat ti special election para iti posision ti senador gapu ta adda daytoy iti national level ken ibutos met dagiti Pilipino iti sabali a pagilian.
