LA UNION – Nangbukel ti Phil. National Police – Pangasinan iti Special Investigation Task Group a mangtutok iti imbestigasyon ti pannakapapatay ti incumbent municipal councilor a ni Ponciano Onia, agtawen ti 59, ken residente ti Barangay San Leon, Umingan, Pangasinan.
Natay iti konsehal kalpasan a paltugan ti riding in tandem idi rabii ti Sabado.
Maibasar iti kauddian a report, addan iti person of interest a nabigbig dagiti otoridad.
Nupay kasta, awan pay ti nalawag a motibo ti napasamak a krimen.
Ni Onia ket adda iti maikadwa a termino kas konsehal ti Umingan ken pabotosan koma manen iti masungad nga eleksiyon.
Amin a posible nga anggulo ti krimen ket kit-kitaen dagiti otoridad a pakaibilangan iti trabaho, negosyo, ken personal a biag.
Iti agdama, naka-half mast ti bandera iti nasao nga ili, kas pannakipag-ladingit iti pannakatay ni Onia.
Nagkari pay ti lokal a gobyerno ti Umingan a mangipaay ti gunguna iti siasinuman a makaitudo kadagiti suspek.
