BR LA UNION – Agpangpangta manen ti storm surge wenno nangangato a dalluyon kadagiti pito a probinsya iti Northern Luzon, gapu iti agraraira a bagyo Emong ken bagyo Dante.
Maibasar iti storm surge warning nga inruar ti state weather bureau ita nga aldaw ti Huwebes, July 24, posible nga umabot iti maysa agingga dua a metro ti kangato dagiti dalluyon iti sumaganad a 36 nga oras.
Nakangato daytoy idiay probinsya ti Batanes, Cagayan, Ilocos Norte, Ilocos Sur, La Union, Pangasinan, agraman idiay probinsya ti Zambales.
Umabot ti agingga 80 a siyudad ken munisipalidad nga agpapada a nakasango iti kabaybayan iti posible a maaapektaran.
Pakaibilangan ditoy dagiti dadackel a syudad kas idiay Lingayen City, Dagupan City, ken Alaminos City idiay Pangasinan; San Fernando City, La Union; Vigan ken Candon City idiay Ilocos Sur; Laoag City idiay Ilocos Norte; Aparri, Cagayan, ken iti capital ti Batanes a Basco; ken Zambales provincial capital nga Iba.
Mabalakadan dagiti agnanaed kadagiti coastal communities kadagiti nadakamat a probinsya a liklikan ti agturong iti igid ti kabaybayan.
Kinanselar metten ti weather bureau iti amin a marine activities, fishing activities, ken dadduma pay nga aktibidad iti kabaybayan.
Namnamaen a mangirwar ti kanayunan nga storm surge warning iti weather bureau ita a malem bayat nga agtultuloy ti panag-pangta dagiti bagyo iti Northern ken Extreme Northern Luzon.
