LA UNION – Inpakaammo ti Sugar Regulatory Administration (SRA) a planoda nga i-export ti 25,000 a metriko tonelada ti raw sugar idiay Estados Unidos agingga iti Agosto 2024.
Inlawlawag ni SRA Administrator Pablo Luis Azcona, masapul a sumangpet dagiti produkto iti US inton Setyembre, isu nga inton Agosto mangrugidan nga ibiahe dagitoy.
Kinunana a agtalinaed a nangato ti buying price iti US ken adu met dagiti exporters ti mangnamnama a makalako iti nasao a pagilian. Maisupadi daytoy iti dati a mapaspasamak no sadino a nababbaba ti quota price iti US ngem ti domestic price isu a pinili ti pagilian ti saan nga ag-export.
Inlawlawag ti SRA Chief a maar-aramid ti panag-export ti raw sugar iti US tapno mapatalged ti lokal a presio ti asukar iti Pilipinas nangruna no adda over production iti asukar.
Gagangay a mapasamak daytoy kadagiti bulan ti Enero, Pebrero, ken Marso, no kangitingitan ti panawen ti milling season.
Ti produksion kadagita a bulan, sigun ken Azcona, ket nangatngato ngem iti mabalin a konsumo ti pagilian, isu a tapno saan a bumaba ti presio, mailako laeng dayta idiay E.U.
Segun ken ni Azcona, immuna a nakisarita ti SRA iti US tapno ipakaammoda a saan a matungpal ti pagilian ti 143,000 MT a sugar quota-na imbes ketdi, agingga laeng iti 25,000 MT, banag nga inawat ti nadakamat a pagilian.
Iti agdama, adda sugar export order a binukel ti SRA ken naipatulod metten kadagiti maseknan para iti komentoda.
Segun iti SRA Chief, mabalin a ma-finalize ti nansao a pammilin ita a Hulio.
.
