Nakita ti dadduma a mangngalap iti Zambales ti bultohan a shabu a tumtumpaw iti taaw a direkta a nakasango iti West Philippine Sea.
Maibasar iti report ti Philippine Drug Enforcement Agency (PDEA), agawiden ti grupo dagiti mangngalap manipud iti sumagmamano nga aldaw a panagkalapda idiay WPS idi nakitada ti sumagmamano a plastic bag a tumtumpaw.
Dagus nga innala dagiti mangngalap dagiti nadakamat a plastic bags ket idi agangay, naduktalan a naglaon ti shabu dagitoy. Agdagup iti 11 a pakete ti nakita dagiti mangngalap.
Dagus nga inyeg da dagiti pakete kadagiti opisyales ti Barangay Matain, Subic. Naiturnover dagitoy iti PDEA-Zambales ken iti Philippine National Police.
Segun iti PDEA, mapattapatta nga agbalor ti P12.24 million dagiti nakumpiskar a pakete ken agdagsen iti nasurok 1.8 kilos.
Buklen ti grupo dagiti mangngalap ti pito a tripulante ken maysa a kapitan.
Basar iti estoriada, nakitada ti kasta a kontrabando agarup 90 nautical miles manipud iti Lubang Islands, Occidental Mindoro.
