LA UNION – Para kadagiti senador, nasaysayaat no saan pay a maipatungpal ti PUV Modernization Program gapu kadagiti parikut iti programa a saan a pay a naikkan ti solusyon na.
Iti hearing ti Senate Committee on Public Services nga idauluan ni Senador Raffy Tulfo, inbatad ni Senador JV Ejercito, nasken nga isardeng pay laeng ti gobierno gapu ta saan pay a nakasagana a mangipatungpal iti nasao a programa.
Kinunana a partikular nga isyu ti financing dagiti modernized jeep gapu ta saan a kabaelan dagiti jeepney operators ken drivers ti nangato a binulan nga amortization.
Adda iti ₱2.4-million pesos ti kalakaan a modern jeep ngem masapul a mabayadan iti uneg ti pito a tawen.
Iti sabali a bangir, ipapilit ni Committee on Public Services Chairperson Raffy Tulfo a mapukaw ti naisangsangayan a disenio dagiti dyip inton naan-anay a maitandudo dagiti moderno a dyip.
Dinamag ni Senador Grace Poe, ania ti aramiden kadagiti nasurok a 36,000 a drayber ti jeepney a saan a nagkonsolidate.
Pinaregta pay ni Poe ti Department of Transportation (DOTr) nga ipangpangrunada ti pannakaileppas dagiti ruta sakbay a kissayan ti agdama a bilang dagiti PUV tapno masigurado a saan nga agkurang iti pagluganan dagiti commuters.
