BR LA UNION – Nangidatag iti sumagmamano nga abogado ti ‘supplemental petition’ idiay Korte Suprema seknan iti panagdengngeg ti House of Representatives Justice Committee iti ‘impeachment’ kontra iti bise presidente.
Iti maysa nga online post, imbinglay ni Atty. Israelito Torreon iti indatagda a petisyon idiay Korte Suprema kadwana ti dadduma pay a petitioner nga isuda Atty. Vic Rodriguez ken Atty. Jimmy Bondoc.
‘Supplemental Petition for Certiorari’ iti naidatag gaputi pammati a saan a maiyannurot iti linteg wenno ‘unconstitutional’ iti implementasyon ti House Resolution No. 892.
Babaen kuna da iti nasao a resolusyon, napalubosan iti komite idiay kongreso a mangisayangkat ti panagdengngeg seknan dagiti reklamo nga ‘impeachment’ kontra kenni Vice President Sara Duterte.
Impaganetget dagiti petisyuner, nga adda napasamak a ‘grave abuse of discretion’ iti biang ti House Committee on Justice agsipudta intuloy da iti panangisayangkat ti hearing nga uray naka-recess iti kongreso.
Gaputi dayta, kinidddaw da idiay Korte Suprema nga ideklara nga ‘unconstitutional’ ken ‘awan bileg ’ iti House Resolution No. 892.
Tarigagay dagiti nasao nga abogado a mawaswas iti amin a naisayangkat a panagdengngeg, subpoenas, mosyon ken dadduma pay nga addang nga inaramid ti komite a maiyannurot iti nasao a resolusyon.
Malaksid dayta, kiniddaw pay dagiti petisyuner iti kangatuan a paugkuman a mang-isyu ti Temporary Restraining Order tapno lapdan iti pannakaituloy ti panagdengngeg.
Iti likudan daytoy, inlawlawag ti grupo a saan da a ranta a protektaran iti bise presidente manipud iti sungsungbatanna, ngem ketdi kayat da a masiguro a maiyannurot iti linteg iti proseso.
