BR LA UNION – Kritikal ti kondisyon dagiti dua a National Guard kalpasan a napaltugan dagitoy bayat a naka-duty idiay Washington D.C. wenno asideg idiay White House.
Napasamak ti insidente, agarop alas 2:15 ti malem (November 26) local time wenno alas 3:15 ti agsapa ti Huwebes (November 27) ditoy Pilipinas.
Dagiti biktima ket manipud estado ti West Virginia.
Ti nasao a pammaltog ket inawagan ni District of Columbia (D.C.) Mayor Muriel Elizabeth Bowser a “targeted shooting.”
Nabigbig metten ti suspek a ni Rahmanullah Lakanwal, agtawen ti 29, maysa nga afghan national.
Awan ti nakumspikar dagiti otoridad a pakabigbigan ti suspek idi arestaren da daytoy, malaksid ti ikot na a handgun a mapapati nga inusar na iti pammaltog.
Immunan nga imbaga ti Federal Bureau of Investigation (FBI) a ti suspek, maibasar iti initial identification ket manipud Washington state a nag-migrate sadiay manipud Afghanistan idi August 2021.
Maibasar iti report, madama ti nainget a panag-patrolya dagiti guardsmen idi mapasamak ti pammaltog.
Inladawan met ni US President Donald Trump ti suspek kas “animal” maibasar iti Truth Social post na ken imbaga na a pagbayadenna ti nangina iti suspek.
