Inwaragawag ti Department of Agriculture (DA) nga ipangato da ti taripa kadagiti maangkat a bigas mangrugi inton Enero 1, 2026.
Ti addang ket kasaruno metten ti panagsagana ti gobierno para ti agtultuloy a panagangkat, a ti agdama ket temporario paylaeng a naipasardeng tapno masalakniban dagiti lokal a mannalon iti kangitingitan ti wet harvest season.
Segun kenni Agriculture Secretary Francisco Laurel Jr., ti panagngato ti taripa ket mangipakpakita laeng kadagiti reyalidad pakairamanan ti panagkapsot ti piso ken ti posibilidad a nangatngato a panagpresio ti sangalubongan a merkado apaman sumrek manen ti Pilipinas iti panag-angkat.
Manamnama a sumangpet inton Pebrero dagiti bagahe ti naangakat a bigas ken agbalin a resonable ti farmgate prices iti panagrugrugi ti dry harvest season.
Inikkat metten ti DA ti kadawyan a sangapulo a porsyento a downpayment para ti kasapulan tapno makagun-od ti Sanitary ken Phytosanitary Import Clearances.
