LA UNION – Sumangsango ita ti kaso nga administratibo ti maysa a pulis ken maysa a postman a natiliw iti uneg ti pallutan idiay Barangay Laoag, Aguilar, Pangasinan.
Nabigbig dagiti naarsto nga isuda PO1 Michael Moreno a nakadistino idiay San Clemente Police Station idiay probinsya ti Tarlac; ken ti postman a ni Mars Quiniones ti Mangatarem, Pangasinan.
Sigun kenni C/Supt. Romulo Sapitula, Reginal Director ti Police Regional Office-1, inaresto babaen kadagiti kameng ti Aguilar Police Station dagiti dua nga adda iti uneg ti pallutan idi malem ti Byernes.
Agatalinaed idiay Tarlac Police Provincial Office ni Moreno kabayatan a maus-usig ti kaso daytoy.
Impabus-oy metten ti pulisya iti pagserserbian nga opisina ti kaso kontra kenni Quinones.
Impaganetget ni C/Supt. Sapitula, nga adda iti linteg a mangdusdusa kadagiti kameng ti gobyerno a matiliw iti uneg ti pagsusugalan wenno agsugsugal.
Impalagip met ti opisyal ti pammilin ni Pangulo Rodrigo Duterte nga arestaren dagiti government workers nga agsusugal kadagiti casino wenno aniaman a gambling institution.
