Kagiddan ti kinabara ti panawen a dumanon ti nasursurok ngem 40°C, napilitan dagiti taxi drivers iti siyudad ti Kandahar, Afghanistan nga agaramid dagiti improvised air coolers babaen kadagiti daan a bariles ken tubo tapno malabanan iti nakaro a pudot kadagiti lugan da.
Segun kakuada, mas epektibo pay iti homemade cooler maiyarig iti built-in air conditioning system dagiti behikulo.
Ipakpakita pay dagitoy iti panangikabil da ti exhaust vent usar iti sticky tape ken iti panagkabit ti unit iti ngato a paset ti taxi.
Aminado met dagitoy a kasapulan ti mano-mano nga ikkan ti danom iti unit, dua a daras iti maisa nga aldaw tapno lummamiis daytoy.
Mabigbig kas maysa kadagiti marigrigat a pagilian iti Afghanistan a nakaro nga apektado ti climate change.
Segun kadagiti report ket namnamaen a lalo pay a kumaro iti init kadagiti sumarsaruno a lawas.
Nupay kasta ket suportado dagiti pasahero iti inaramid nga innovation dagiti driver.
Maibasar iti UN Food and Agriculture Organization, nakapadas iti Afganistan ti kabaraan a summer ita a tawen ken agdama a makapaspasar ti nalawa a kalgaw a makadadael iti pagbyagan dagiti mannalon.
Iti laksid ti nakaro nga epekto ti climate change, saan a mairamraman iti Afghanistan kadagiti tinalantan ti UN seknan iti klima manipud idi binawi ti Taliban iti bileg da idi 2021.
