BR LA UNION – Pimmigsa ti bagyo nga imon-monitor ti PAGASA_DOST iti ruar ti Philippine Area of Responsibility (PAR).
Iti alas 5:00AM a weather advisory, ti Tropical Depression FUNG-WONG ket maysa itan a Tropical Storm ti kategorya na.
Ti sentro ti Tropical Storm FUNG-WONG ket naudi a nasaripatpatan iti kaadayu a 1,715 km daya ti Northeastern Mindanao (adda pay laeng iti ruar ti PAR).
Kabuyog na ti angin a 65 km/h asideg iti sentro ken kapegges a dumanon iti 80 km/h.
Dup-dupagen ti bagyo iti amianan-a-palaud iti kapaspas a 20 kilometro kada oras.
Iti track forecast, ti bagyo ket mapatta-patta a sumrek iti PAR inton bigat ti rabii (November 7) wenno nasapa a bigat ti Sabado ( November 8).
Maawagan a bagyo UWAN nu sumrek iti teritoryo ti Pilipinas.
Nupay awan ti panniguro nu anya ti mabalin a mapasamak wenno pagbaliwan iti day-4 ken day-5 forecasts, dakkel ti posibilidad nga ag-landfall ti bagyo inton Lunes (10 November) kadagiti lugar iti Northern wenno Central Luzon.
Nu maipapan iti intensity, maibasar iti forecast ti PAGASA, napaspas ti panag-pigsa ti nasao a bagyo.
Posible a dumanon iti Typhoon Category inton bigat ken Super Typhoon Category inton Sabado.
Posible pay nga ag-landfall bayat ti peak ti kapigsa na, maibasar iti forecast ti PAGASA.
Mapakdaaran dagiti umili a posible a maipangato a dagus ti ballaag ti bagyo iti dumaya a paset ti Luzon ken paset ti Samar Provinces inton bigat ti rabii (November 7) wenno bigat ti Sabado (November 8).
Ti posible a kangatuan a ballaag ti bagyo maibasar iti agdama a forecast scenario ket Wind Signal No. 5.
Maipakdaar a maibilang a life-threatening wenno delikado iti biag ken sanikua iti narungsot a panawen iti Northern Luzon ken paset ti Central Luzon inton Lunes (November 10) ken Martes (November 11).
