LA UNION – Maipatungpal inton alas-2:00 ti malem, aldaw ti Huebes ti temporay closure ti Naguilian-Baguio Road idiay central business area iti ili ti Naguilian, La Union gapu ti maangay nga street dancing competition para ti panagrambak iti Basi Festival.
Iti pannakiuman ti Bombo Radyo kenni C/Ins. Cirillo Butigan Jr., hepe ti Naguilian Police Station, kinunana a nakasirra ti nasao a kalsada agingga alas-5:30 ti malem.
Saan a mapalubusan dagiti heavy vehicles kas iti trucks ken bus a sumrek iti Naguilian, ngem mabalinda a dumalyasat idiay Marcos Highway a sumang-at wenno sumalog manipud iti syudad ti Baguio.
Makaserrek laeng dagiti light vehicles iti nasao nga ili, ngem kasapulan a surutenda ti re-routing.
Naipapakaammo metten kunana ti nasao a temporay road closure kadagiti operator iti bus ken adda met dagiti pulis a mangiwanwan kadagiti motorista manipud iti ruar ti Naguilian tapno saan a mailaw-an dagiti motorista.
