Pinasingkedan ti kampo ni dismissed Bamban, Tarlac Mayor Alice Guo a nakumpleton dagiti testimoniya sadiay Pasig Regional Trial Court ti maysa kadagiti testigo ti prosecution iti qualified human trafficking case kontra iti naikkat nga Mayora.
Segun iti maysa kadagiti abogado ni Guo a ni Atty. Lorelie Santos, nupay agmaymaysa daitoy a testigo kadagiti nasurok sangapulo a dadduma pay, ti panagpresenta met ket dakkel a makatulong para iti panagrang-ay ti kaso.
Kabayatanna, ti napasamak a panagdengngeg idi kalman ket ti panangipresenta kadagiti ebisdensya ken nakipaset ni Guo babaen ti video conference.
Maipalagip nga nagtaud ti kaso kontra kenni Guo gapo iti reklamo nga indatag kenkuana ti Philippine National Police Criminal Investigation and Detection Group (PNP-CIDG) ken ti Presidential Anti-Organized Crime Commission (PAOCC).
Naakusaran isuna iti pannakikunsabo ti maysa a paupahan nga kompaniya ti Philippine Offshore Gaming Operation (POGO) hub a Zun Yuan Technology Incorporated idiay Bamban, Tarlac a naraut idi Marso 2024.
