BR LA UNION – Kinumpirma ni sigud nga Audit–Intelligence and Confidential Funds Audit Office (COA-ICFAO) state auditor ken prosecution witness Roderick Wamil a ni Vice President Sara Duterte laeng ti nagbalin a Bise Presidente ken sekretaryo ti Department of Education (DepEd) a naaddan ti confidential funds iti napalabas a tallo nga administrasyon.
Iti maika-11 nga aldaw ti impeachment trial idi kalman, Agosto 3, imbaga ni Wamil nga iti unos ti panagtakem na iti COA-ICFAO manipud 2014 agingga 2024, awan ti confidential funds iti Office of the Vice President iti panawen da sigud a Vice Presidents Jejomar Binay ken Leni Robredo.
Kinuna pay ni Wamil, in-audit ti COA iti panangusar ti DepEd ti P112.5 milyon a confidential funds idi umuna agingga maikatlo a quarter ti tawen 2023 wenno sag-P37.5 million kada quarter.
Para met iti OVP, imbaga na nga umabot iti P125 million kada quarter ti confidential funds manipud maikapat a quarter ti 2022 agingga maikatlo a quarter ti 2023, nga adda pakabuklan a P500 million.
Kabayatanna, imbaga ti lead defense counsel a ni Atty. Michael Poa a ti testimonya ni Wamil ket nakaibasar laeng iti panawen ti panagtakem na iti COA-ICFAO.
Immunan a pinaglibakan ti kampo ni Duterte iti waragawag a nagastos ti OVP iti P125 million confidential funds iti uneg laeng ti 11 nga aldaw idi Disyembre 2022.
