BR LA UNION – Inyanunsiyo ti social media app a TikTok nga isubli da iti serbisyo kadagiti 170 milyon a users da idiay US.
Kasaruno daytoy iti inaramid nga anunsiyo ni US President-elect Donald Trump nga ipaayan na ti nawadwad nga aldaw tapno i-assess iti nasao nga app apaman a makatugaw iti puwesto.
Segun iti Chinese-owned app, iyur-urnos dan ti pannakaisubli ti app idiay US kagiddan ti panagyaman da kenni Trump gaputi impaay na a palawag ken panniguro.
Impasigurado pay ti kompanya a makitinnulong da kenni Trump para iti longtime solution ken mapagtalinaed ti app iti TikTok.
Maipalagip nga idi Domingo, saan a malukatan ken mausar ti sumagmamano a milyon a TikTok account dagiti users idiay US kalpasan a maipasa ti linteg idi Abril nga ikkaten ti nasao nga app gapu iti atap ti US a mangisay-sayangkat ti panag-ispiya ti China kadakuada.
