BR LA UNION – Dinutukan ni President Ferdinand Marcos Jr. ni CIDG Director PMGen. Nicolas Torre kas sumaruno a PNP Chief kasukat ni PGen. Rommel Francisco Marbil nga agretiro iti serbisyo.
Segun kenni Executive Secretary Lucas Bersamin, lima a nagan ti nagpilian ni Pres. Ferdinand Marcos Jr. iti agbalin a PNP Chief ngem nagpannuray ni Torre.
Ni Torre iti kaunaan a PNPA graduate nga agtugaw a PNP chief.
Miyembro isuna ti Philippine National Police Academy (PNPA) 1993.
Segun kenni Bersamin, iti appointment ni Torre ket maibasar iti merito ken performance.
Dinipensaan ti Malakanyang iti panangdutok kenni PMGen. Torre, a segun ken ni Bersamin, a ti pannakapili ni Torre ket absolute discretion ti presidente ti pagilian nga awan ti mabalin a mangkuwestyon.
Ngem awan ti maibaga ni Bersamin, nu iti panangpili ti Presidente kenni Torre ket maibasar iti nagbalin a performance na iti panang-kemmeg kenni Kingdom of Jesus Christ Pastor Apollo Quiboloy ken sigud a Presidente Rodrigo Duterte.
Kinuna pay ni Bersamin nga amin a promosyon ket maibilang a reward, ngem daytoy kunana ket kaibatugan metten ti merit.
Segun kenni Bersamin, adda pay met ti dadduma a konsiderasyon ken saguday nga inkonsidera ti presidente kas met laeng ti saguday ti dadduma a contender iti pwesto.
Ni Torre ket addaan ti dua nga estrella iti abaga iti agdama ken awaten na ti maika-uppat nga estrella wenno iti kangatuan a ranggo iti PNP inton maisayangkat ti turnover ceremony inton June 2, 2025.
