LA UNION – Impanamnama ni DPWH Secretary Mark Villar nga aramiden amin a wagas ti ahensiya tapno makissayan ti nakaru a problema ti trapiko iti intero a pagilian, kangrunaan na idiay Metro Manila.
Daytoy ket maipasa man wenno saan idiay kongreso iti kidkiddawen nga emergency power ni President Rodrigo Duterte tapno nabibiit a masolbar iti nakaru a traffic congestion idiay Metro Manila.
Siniguro ni Villar a nailatang ti dackel a pondo para kadagiti naduma-duma a proyekto a mangpasayaat iti kalsada, nga isuti pattien na a mangkissay iti nairut a taray ti trapiko.
Ni Secretary Villar ket nagturong ditoy probinsya ti La Union idi kalman kagiddan ti panangisayangkat na ti inspection kadagiti proyekto ti ahensiya, kas koma kadagiti drainage system, diversion road, La Union Convention Center, flood control projects ken dagiti on going road widening projects.
Nagserbi pay a kangrunaan a bisita iti panaglukat ti Agri-Tourism Festival kas paset iti seleberasyon ti founding anniversary ti La Union.
