BR LA UNION – Nangiruar ti show cause order iti Tri Committee kontra iti sumagmamano a social media personalities, kabilang ni sigud a Presidential Communications Operations Office (PCOO) chief Trixie Cruz-Angeles, gapu iti saan da a panagdar-ay iti panagdengngeg ti Kamara seknan iti panangiwaras ti peke a damag ken online disinformation.
Napatulodan pay ti show cause order da Elizabeth Joie Cruz alias Joie De Vivre online; Krizette Lauretta Chu, Mark Anthony Lopez, Jun Abines Jr., Dr. Richard Tesoro Mata, Aaron Peña, Suzanne Batalla (IamShanwein) ken Ethel Pineda.
Ni Manila Rep. Bienvenido “Benny” Abante iti nangidatag ti mosyon tapno mangiruar ti show cause order kontra kadagiti nasao a personalidad.
Kinuna dagiti mammanday-linteg a saan a maakseptar dagiti rason nga inted dagiti napaayaban nga indibidual, isunga nangipaulogda iti show cause order.
Nagbalin a nabara ti diskusion gaputa dagus a pinagkedkedan ni sigud a PCO Secretary Trixie Cruz-Angeles ti awis ti Komite ken kinunana a maikontra iti konstitusion ti Tri Com hearing.
Gapu iti daytoy, kinuwestyion ni Rep. Stephen Caraps Paduano nu pudno nga abogado ni Angeles.
Malaksid iti panangipaulog ti show cause order kenni Angeles, inrefer pay ti Komite ti kaso ni Angeles iti legal department ti House Department para iti posible a disbarment complaint.
