LA UNION – Isagsaganan ti pulisya ti kaso kontra ti maysa a tricycle driver a maipagarup a nangipasarang ti paltog idiay Barangay Barrientos, ili ti Luna, La Union.
Nabigbig ti suspek a ni Teddy Augusto, 39, residente ti Barangay Paraoir, ili ti Balaoan, La Union.
Naammuan ti Bombo Radyo manipud iti Luna Police Station, maipagarup a sinaruno ti suspek a nakalugan iti traysikelma ti biktima a ni Jet Nemir nga agmanmaneho met ti traysikel.
Binusihaan ti suspek ti biktima isu a simmardeng dagitoy kasaruno iti panangipasarang ti paltog.
Dagus met a nagresponde dagiti pulis ken tiniliwda ti suspek.
Naala met manipud iti suspek ti cal .9mm a paltog nga impasarang daytoy.
Kaso a grave threath ken illegal possession of firearms ti posible a sanguen ti traysikel drayber. (Absalom Flores)
