LA UNION – Sinampaan iti pulisya ti kaso a panangpapatay ti gwardya a nagpaltog iti maysa a tricycle driveriti sango ti supermart idiay Barangay San Nicolas Norte, ili ti Agoo, La Union.
Nabigbig ti suspek a ni Ferderick Cabral, residente ti Barangay San Joaquin Norte ti nasao nga ili.
Naammuan iti Bombo Radyo manipud ti Agoo Police Station, kabayatan a naka-duty ti gwardya ket naimatanganna nga umis-isbo ti biktima asideg iti lugan ti employerna nga adda iti parking area ti supermart isu a sinitana daytoy.
Maipagarup a pimmidot iti bato ti biktima kaddua ti maysa a lalaki ken barsakenda koma ti suspek.
Nag-warning shot pay ti gwardya idi nga immatake ti biktima ngem saan daytoy a nangikaskaso.
Gapu iti daytoy, maipagarup a pinaputukan iti paltog ti gwardya ti biktima tapno depensaan ti bagina.
Natay kabayatan a maag-agasan idiay ospital ti nasao a tricycle driver kalpasan a matirwan iti bala ti tiyan.
Adda iti kostudiya ti pulisya ti nasao a suspek.
