LA UNION – Agtultuloy a maag-agasan idiay ospital ti maysa a tricycle driver a nadalapud iti closed van idiay Naguilian-Baguio Road ti Barangay Gueset, ili ti Naguilian, La Union.
Nabigbig ti biktima a ni Fabian Lusica, residente ti Barangay Ambaracao ti nasao nga ili.
Iti report a nakalap ti Bombo Radyo manipud iti Naguilian Police Station, pumanaw kuman manipud iti gasolinaan ti biktima a nakalugan iti traysikel idi a dinalapud daytoy iti closed van a manmanehuen ni Jayson dela Pena, 28, residente ti Cuyapo, Nueva Ecija.
Gapu ta napartek iti taray ti closed van ket nairaman a nadungpar dagiti uppat a motorsiklo a nakaparada iti parking area ti gas station.
Maipagarup a pimmalya iti preno ti nasao a closed van.
Isagsagana metten ti pulisya iti kaso kontra ti respondent driver.
