LA UNION – Dead on arrival idiay ospital ti truck driver kalpasan a paltugan daytoy iti riding in tandem suspects iti kawatiwatan ti national highway idiay Barangay Calumbaya, ili ti Bauang, La Union itattay alas-11:00 ti aldaw.
Nabigbig ti biktima a ni Paul Carbonell, 56, residente ti Barangay Central East ti nasao nga ili .
Naammuan ti Bombo Radyo manipud iti Bauang Police Station, kabayatan nga agmanmaneho iti truck ti biktima ket pinaltugan daytoy iti dua a lallaki nga agkalubbon iti maysa a motorsiklo ken dagus a naglibas kalpasan iti krimen.
Agtultuloy iti imbestigasyon ti pulisya tapno maammuan iti motibo ken pakabigbigan dagiti suspek.
Base iti datos, daytoyen iti maika-pito nga insidente iti pammaltog ti riding in tandem suspects iti probinsya a La Union manipud idi bulan ti Enero agingga ita a kanito iti tawen 2018. (Absalom Flores)
