Nangidutoken ni US President Donald Trump kadagiti 2K a National Guard troops sadiay Los Angeles idi aldaw ti Dominggo tapno sungbatan ti kinaranggas nga inggubuay dagiti agpoprotesta kontra dagiti immigration enforcement raids. Segun ti White House, daitoy ket paset ti kampanya da tapno gibusenen ti “lawlessness.”
Kinuna met ni California Governor Gavin Newsom a ti panagdeploy kadagiti National Guards ket mangpakaro laeng iti tensyon gsipud ta kabaelan met a sungbatan ti lokal a gobierno ti sitwasyon.
Naiyuswat ti pammilin kalpasan ti dua nga aldaw ti kinaranggas ti nagbaetan dagiti demonstrador ken federal agents ti Estados Unidos nu sadino ket nangaramat pay dagiti otoridad kadagiti tear gas ken flash-bang grenades.
Kabayatanna, nangusar met dagiti raliyista kadagiti fireworks ken nangibarsak ti bato. Adda pay dagiti kokotse nga inuram da ken binarikadaan a kakalsadaan, usar dagiti shopping carts ken sako a naglaon ti semento.
Makuna a kadagiti immuna nga aldaw ti protesta ket nangisayangkat ti nalawa nga immigration raid ti federal agents kadagiti high-profile workplace ken 82% kadagitoy ket Hispanic wenno Latino.
Nagpakdaar met ti Defense Secretary ti Estados Unidos nga apaman kumaro ti sitwasyon, mabalin a mangusar ti gobierno kadagiti aktibo a soldado, karamanen ti Marines sadiay Camp Pendleton.
Ti sabali a bangir ket immapela met ni Karen Bass, Mayor ti Los Angeles para ti kinakapia, ngem kinunana a ti kinaranggas ket adda kasukat na a pagsungbatan. Innayon na a nupay karbengan met ti nawaya a panagprotesta, saan a kayat a satwen a mausaren daitoy tapno manggulo, mangdangran, ken mangdadael kadagiti sanikua.
Maar-aramid laeng ti panangideploy ti National Guard kadagiti panawen ti natural a kalamidad. Maudi a naideploy dagitoy iti tawen 2020 kasaruno ti pammapatay kenni George Floyd, maysa nga African-American a pinatay ti white police officer idiay Minneapolis, Minnesota.
