BR LA UNION – Imballaag ti US Tsunami Warning System ita nga aldaw ti Miyerkules (Martes idiay Amerika) iti posible a tsunami idiay Japan kalpasan iti napigsa a panagdayyeg ti magnitude 8.6 a gingined a timmama idiay Kamchatka Peninsula idiay Russia.
Segun iti US Geological Survey (USGS), ti gingined ket nailista iti kauneg a 19.3 km wenno 12 miles ken timmama iti kaadayu a 125 kilometro daya ti Petropavlovsk-Kamchatsky, maysa a coastal city wenno kabaybayan a lugar idiay Far Eastern Russia.
Kinuna dagiti eksperto a posible a makapadas ti nangangato a dalluyon iti sumagmamano a paset ti kabaybayan ti Russia ken Japan iti uneg ti tallo nga oras kalpasan ti gingined.
Idiay Japan, nangiruar ti tsunami advisory para iti dumaya a paset ti Hokkaido agingga Wakayama, a posible a makapadas ti 1 agingga 3 metro a kangato ti dalluyon.
Dagus a nangbukel ti task force iti gobyerno ti Japan para iti monitoring ken posible a nasapa nga aksyon.
Nangiruar met ti tsunami watch dagiti otoridad para idiay isla ti Hawaii (US), Guam ken isla idiay Micronesia agraman iti kabaybayan ti US West Coast (California, Oregon, ken Washington), Aleutian Islands ken iti dakkel a paset ti Alaska.
Idiay Russia, naipadamag iti 3 agingga 4 metro a kangato ti tsunami a namnamaen iti sumagmamano a paset ti Kamchatka.
Segun kenni Kamchatka Governor Vladimir Solodov, daytoy iti kapigsaan a gingined a nailista iti rehiyon iti uneg ti sumagmamano a dekada.
