LA UNION – Nakitaan ti ilegal a droga ti bangkay a nasarakan ti maysa a manager iti fast-food restaurant idiay kawatiwatan ti national highway ti Barangay Bungol, Balaoan, La Union idi parbangon ti Pebrero 24, 2026. Ti nasao a bangkay ket nakasuot ti black-and-white striped jacket ken maong shorts. Mapatta-patta a 30 agingga 35-anyos ken agtayag iti 5’4″.
Segun iti testigo a ni Job Catalan Arciaga, naka-motorsiklo isuna iti agpa-Amianan a direksyon idi nadlawan na ti black-and-blue SYM motorcycle a nakaparada iti extension lane.
Nakaandar paylaeng ti nasao a motor ken nakasango ti pa-Amianan a direksyon kasta met nga adda iti lalaki a nakaidda iti abay na isu a nagsubli ti testigo tapno umay ammoen nu anya ti napasamak.
Pagaropen na a ti lalaki ket naaksidente isu a nagturong isuna idiay Balaoan District Hospital tapno ipadamag ti insidente. Dagos a nagturong ti attending physician a ni Doctor Nash Tamayo iti lugar ken iti kapada metlaeng nga aldaw ket indeklara na a natayen ti biktima ti agarop alas-4:30 ti parbangon.
Kabayatanna, nalawag nga adda iti foul play ti insidente agsipud ta nakakita dagiti kameng ti Balaoan Municipal Police Station ti tallo a basyo ti kalibre .45 a paltog iti crime scene kasta met ti maysa a heat-sealed transparent plastic sachet a naglaon ti white crystalline substance a maatap kas shabu iti bulsa ti biktima.
Naaramid iti inisyal nga imbestigasyon iti presensya dagiti kameng ti Balaoan Municipal Disaster Risk Reduction and Management Office ken idi agangay ket nakiddaw iti tulong ti Scene of the Crime Operatives para ti pannakaproseso iti crime scene.
