LA UNION – Naaprubaranen iti kanayunan a suweldo dagiti mangmangged iti pribado a sektor iti Rehiyon 1.
Segun iti Regional Tripartite Wages and Productivity Board (RTWPB), adda ti kanayunan a P33 para iti inaldaw a suweldo dagiti mangmangged nga agbalin nga epektibo inton Nobyembre 7.
Maibasar iti Wage Order No. RB 1-23 a naaprubaran idi October 16, agbalinen a P435 iti minimum a suweldo dagiti adda iti agriculture ken non-agriculture sector, partikular dagiti addaan ti empleyado a saan a nababbaba ngem 10.
Agbalin metten a P468 ti suweldo dagiti mangmangged iti non-agriculture sector, nga addaan ti nasur-surok ngem 10 nga empleyado.
Mabenipisyaran iti nasao a wage hike dagiti 170,143 a minimum wage earners ken 349,112 a full-time wage ken salary workers.
Iti nasao a baro a wage rate ket eight-percent a ngimmato manipud iti agdama a suweldo dagiti private worker ken mangipaay pay daytoy ti 12% increase iti wage-related benefits a pakaibilangan ti 13th-month pay, service incentive leave (SIL), ken social security benefits kas iti SSS, PhilHealth, ken Pag-IBIG.
Kabayatanna, ngumato pay ti binulan a suweldo dagiti domestic workers.
Maiyannurot iti inaprubaran ti RTWPB a Wage Order No. RB 1-DW-05, ngumato ti P500 iti binulan a suweldo dagiti kasambahay.
Kaipapanan nga agbalin a P6,000 iti monthly minimum wage dagiti domestic workers manipud iti agdama a P5,500.
Umabot ti 99,024 a domestic workers iti rehiyon uno ti manamnama a mabenipisyaran iti nasao a wage order.
