Kalpasan ti dua nga aldaw ti negosasyon idiay London, inyanunsyo ni US President Donald Trump a nagtungpalen ti “deal” ti saritaan ti Estados Unidos ken China tapno lumag-an ti tensyon ti tariff dagiti dua a pagilian.
Segun kenni Trump, immanamongen ti pagilian a China nga agsupply da manen kadagiti magnets ken rare earth metals idiay Estados Unidos bayat nga imbabawi met ti Amerika pangta a panangiparit ti visa kadagiti estudyante a Chinese. Kinuna ni Trump a ti katulagan ket “done, subject to final approval” manipud kenkuana ken ni Chinese President Xi Jinping.
Nupay kasta, limitado paylaeng dagiti detalye ti katulagan a paset met ti nalawlawa manen a truce nga immuna a nailatag idi bulan ti Mayo.
Segun kadagiti opisyales manipud Estados Unidos ken China, nakabukel dan ti framework tapno maipatungpal dagiti napagtulagan sadiay Geneva ken dagiti napagpatangan babaen ti telepono da Trump ken Xi idi Hunyo 5, 2025.
Kabayatanna, inwaragawag met ni Trump a mangiruar da kadagiti baro a tariff terms ti uneg ti maysa agingga dua a lawas sakbay iti Hulyo 9 a deadline. Imbatad ni US Treasury Secretary Scott Bessent a posible a mapawaywayan ti suspension dagiti dadduma pay a taripa bayat nga agtultuloy met ti panagtataripnong kadagiti sabali a pagilian.
Maipalagip a ti saritaan ket nagtaud iti reklamo ti Amerika a nabuntog la unay iti China ti panangiruar kadagiti rare earth exports bayat a binabalaw met ti Beijing ti panagbalin a strikto ti Estados Unidos iti panagserrek ti teknolohiya kas iti Artificial Intelligence ken semiconductors.
Nupay positibo ti tono ti nagsinnumbangir a dasig, inlawlawag met ti eksperto a ni Terry Haines manipud Pangaea Policy a saan pay a naan-anay daitoy a maibilang kas trade agreement.
