BR LA UNION – Binisita ni US President Donald Trump dagiti lugar a nadidigra ti wildfire idiay Southern California ita nga aldaw ti Biyernes, oras idiay Amerika.
Aganay 77% iti Palisades Fire ti naseb-sebanen wenno na-contain. Umabot ti 9,500 hectares a paset ti Palisades county iti nauram, segun iti California Department of Forestry and Fire Protection.
Idi simmangpet iti tarmac idiay Los Angeles ni Trump, sinabat ken nag-lamano da kenni Democratic Gov. Gavin Newsom.
Daytoy ket laksid iti direkta a panangbabalaw itay nabiit ni Republican Pres. Trump kenni Newsom, a segun kenkuana ket saan koma a napasamak iti wildfire nu saan a managbaybay-a iti gobernador.
Nupay kasta, nagbalin a napudno ni Newsom iti panagtungtong da kenni Trump ket imbaga na a kasapolan da ti tulong ti Presidente.
Saan a nalipatan ni Newsom iti panangtulong ni Trump kadakuada idi panawen ti COVID-19, isunga mangnamnama ti gobernador a tumulong manen ita ti Presidente para iti speedy recovery kadagiti lugar a dinidigra ti wildfire.
Direkta a binabalaw ni Trump dagiti california leaders iti limmawa a wildfire, partikular iti kinakurang ti danum.
Imbaga pay ni Trump ti pannaka-upay na iti FEMA wenno Federal Emergency Management Agency, a responsable iti panag-responde kadagiti mapasamak a kalamidad idiay California ken North Carolina.
Inawagan ni Trump a “very big disappointment” iti biang ti FEMA, gaputi nalawa a wildfire idiay Los Angeles ket ikon-konsidera na a buraken laengen ti nasao nga ahensiya.
Ngem impaganetget ni Trump nga awan ti Golden Age nu awan ti Golden state, isunga nagkari daytoy a tumulong iti panag-recover ti nasao a lugar.
Maipalagip nga iti inaugural speech ni Trump, indeklara na iti Golden Age tapno isubli iti sigud nga estado ti Amerika.
Iti nasao a panagbisita ket naka-taripnong na pay iti sumagmamano a residente ken nakita na iti sumagmamano a problema.
