Binabalaw da US President Donald Trump ken tech giant a ni Elon Musk iti foreign aid agency nga USAID a “corrupt ken incompetent”.
Iti maysa a press conference idi Martes, oras idiay Amerika, pinasingkean ni Trump iti commitment na iti panangimaton ken impaganetget na a naipatugaw daytoy tapno siguradwen ti kinapudno wenno integridad iti gobyerno ti Amerika.
Imbaga pay ni Trump a ti panangsukimat na iti gobyerno ket saan laeng iti USAID ngem ketdi sakop daytoy iti dadduma pay a sektor kas iti edukasyon ken militar.
Kabayatanna, binigbig met ni Elon Musk a dinutukan ni Trump kas head ti Department of Government Efficiency nga adu ti naaramid a pagimbagan iti USAID ngem imbaga na a nakaru a nakaimpluwensiya ti ahensiya iti eleksiyon iti mapagdudua-an a wagas.
Maipalagip nga immandar ni Trump babaen iti bileg ti executive order nga isardeng iti kaadwan a foreign aid ti Amerika maiyannurot iti “America First” policy na a nangpasareng iti ginasut a programa nga agbalor ti binilyon a dolyar a sangalubongan a tulong.
