BR LA UNION – Target ti Department of Education (DepEd) nga ipaayan ti promosyon iti agarup 100,000 a teachers ken school heads sakbay nga aggibus ti agdama a tawen, kas paset ti napalawa a suporta ken reporma para iti sektor ti edukasyon ditoy pagilian.
Inpakaammo daytoy ti departamento kagiddan ti panagpatingga ti School Year 2025-2026 ken opisyal a panangrugi ti makabulan a bakasyon dagiti mangisursuro idi kalman, Abril 1.
Segun iti DepEd, ti nadakamat a target ket maipatungpal iti sidong ti Expanded Career Progression System, nga addaan tarigagay a mangipaay iti mas nalawlawag ken naparpartak a proseso ti promosyon para kadagiti educator.
Daytoy nga addang ket resulta ti nagsasaruno a konsultasyon ken panagbisita kadagiti pagadalan.
Malaksid iti promosyon, sinigurado pay ti ahensiya a mapalag-anan ti workload dagiti mangisursuro iti klase.
Karaman kadagiti reporma a nabiit pay a naipatungpal ket ti pannakarebisar dagiti pagannurotan para iti classroom observation, pannakaiwaras ti overtime ken overload pay, ken naan-anay a pannakakissay ti administrative workload.
Agtultuloy met ti panagiwaras ti gobierno kadagiti laptop ken dadduma pay a learning resources.
Dinayaw ni Education Secretary Sonny Angara ti sakripisyo dagiti mangisursuro iti agtultuloy a panangsukog kadagiti agtutubo iti laksid dagiti karit iti sektor.
Kabayatanna, ibilang met ti DepEd a pammaneknek iti ngumatngato a kalidad ti edukasyon dagiti naisangsangayan a ballaygi dagiti estudyante ita a tawen.
