LA UNION – Immalma ni San Juan, La Union Vice-mayor Miko Magsaysay kadagiti nagbalin a waragawag ni San Juan Municipal Mayor Arturo Valdriz maipapan iti panangipatupal ti Tulong Panghanapbuhay sa Ating Displaced/Disadvantaged Workers (TUPAD) project iti nasao nga ili.
Iti pannakiuman ti Bombo Radyo kenni Vice-mayor Magsaysay, kinunana a saanna a maawatan no apay nga inraman ti alkalde iti naganna maipapan ti isyu iti panagipatungpal ti nadakamat a proyekto kangruaan iti alegasyon nga adda ti nagwaras a “forms” ti PDP-Laban ken ti organization da a Miko-Migz.
Inlawlawag ti bise-alkalde a saan a kontektado ti oragnisasyonda a Miko-Migz iti Tupad project gapu ta programa daytoy iti nanangna a ni Senior Citizen Partylist Rep. Mila Magsaysay ken ti Department of Labor and Employment (DOLE) .
Sigun kenni Vice-mayor Magsaysay, dagiti ibagbaga iti Mayor a naiwaras a form ti organisasyon ken idi pay laeng napalabas a tawen para iti insurance dagiti mieymbroda.
Awan met iti kinapudnona, kinuna iti vice-mayor, dagiti impulong dagiti kapitan kenni Mayor Valdriz a napilit wenno naallilaw dagitoy a nagpirma iti dokumento.
Dagiti pay koordinatorda ti maipagarup a nakapasar iti harrasment kadagiti kapitan ken uray isuna ket napapadas met iti panangbastos manipud ti maysa nga officer in charge ti barangay.
Kabayatanna, impaganetget pay ni Magsaysay a ti TUPAD project ket adda siodong iti DOLE ken saan a kapada iti cash for work ti Department of Social Welfare and Development (DSWD) a nasken a dumalan pay iti munisipyo wenno iti opisina ti alkalde.
Maipagarup a kiniddaw ti mayor iti opisina ti DOLE nga i-defer wenno saan nga ituloy ti TUPAD project gapu ta ibagbaga daytoy babaen ti suratna a masapul a dumalan iti proseso wenno ammo ti munisipyo ti nadakamat a proyekto.
Kinuna pay ni Magsaysay, a base iti inruar a guidlines ti DOLE ket saan a masapul nga ipakada pay iti local chief executive iti Tupad project.
Binabalaw pay ti Vice-mayor ni Mayor Valdriz gapu iti naisawang daytoy iti interview ti Bombo Radyo nga adda dagiti nailista a disabled person, 8-year old, wenno taga-sabali nga ili a beneficiaries.
Kas sungbat, impeksa ni Vice-mayor Magsasay nga agiwarwaras iti fake news ti alkalde ken saan met a tabbed dagiti mangipatpatungpal iti nasao a programa tapno ilista dagiti saan a maiparbeng a recipients.
Kinarit na ti mayor nga agsarita nga addaan ti dokumento wenno pammaneknek.
Kabayatanna, nagturong iti estasyon ti Bombo Radyo La Union iti 31 a barangay chairmen iti ili ti San Juan tapno sungbatan dagiti naisawang ni Vice-mayor Magsaysay.
Iti palawag ni Association of Barangay Captains President Dionisio Velasco, maipagarup a naaramat iti naganna babaen kadagiti koordinator ti mammanday-linteg tapno mapapirma dagiti dadduma a kapitan iti listaan dagiti agbalin a benepisyaryo ti kunkunada a ‘cash for work’.
Sigun kenni Velasco, kaadduan a kapitan idiay San Juan iti agrekreklamo gapu ta saan nga isuda ti nangpili dagiti mabinipisyaran iti proyekto ken saanda pay nga ammo iti panggep dagiti listaan.
Gapu iti daytoy napagtutulagan dagiti kapitan ng i-retract dagiti signatures dagiti nailaw-an a nagpirma iti dokumento.
Impeksa met dagiti dadduma pay a barangay chairmen a saan a pudno dagiti insawang ni Vice-mayor Magsaysay a laplapdanda iti proyekto a pagsayaatan dagiti bumarangay.
Immuna iti daytoy, makipalagip a saan a nalapdan ni Senior Citizen Partylist Rep. Magsaysay a babalawen ni Mayor Valdriz ken iti aganay amin a barangay chairmen iti nadakamat nga ili gapu ti maipagarup a pananglapped daytoy iti ipatpatungpalna a proyekto.
Iti ekslusibo nga inteview ti Bombo Radyo kenni Rep. Magsaysay, kinunana a political harrasment iti inarmid ni Valdriz ken dagiti kapitan a manglaplapped ti Tulong Panghanapbuhay sa Ating Displaced/Disadvantaged Workers (TUPAD) project-da iti DOLE a pagnumaran iti 1,500 a bilang dagiti nakukurapay nga umili idiay San Juan.
Sigun iti mammanday-linteg, nakadawat isuna iti P4.6 million manipud iti opisina ni Labor Sec. Silvestre Bello III tapno ipatungpal ti nasao a proyekto.
Inlawlawag ni Rep. Magsaysay, a saan a nasken nga agpolitika wenno awan ti karbengan a lapdan ti alkalde ti proyekto gapu ta daytoy ket ipatpatungpalna kas pannakabagi ti kongreso ken ti DOLE nga adda iti sidong national government.
Binabalaw ken sinungbatan met ti mammanday-linteg iti mayor gapu iti maipagarup a waragawag daytoy nga awanan ti pondo ti proyekto.
Impaganetget ni Rep. Magsaysay a saan daytoy a mangal-allilaw wenno saan isuna a mangipatungpal iti proyekto kaddua ti DOLE nga awanan ti pondo.
Saanda met nga impabus-oy kadagiti barangay officials ti panangsapul ti benepisyaryo gapu ta mabalin a ti agnumar laeng ditoy ket dagiti kakabagyan dagitoy a saan met a pudno a nakurapay.
Innayon pay ti partylist solon, nga ammo met ni Mayor Valdriz ti nasao a programa idiay ilida.
Ngem nadismaya ti mammanday-linteg gapu iti panagsurat daytoy iti DOLE tapno kwestiyunaran ti proyekto.
Saanna met nga inimbitaran ti alkalde gapu ta maipagarup nga immunan a nilapdan daytoy iti immuna a proyekto a panangiuawaras iti farm equipments kadagiti mannalon.
Kabayatanna, nainget met a pinaglibakan ni Mayor Valdriz dagiti imbutaktak ti kongresita a laplapdanna ti nasao a proyekto.
Kinuna ni Mayor Valdriz iti Bombo Radyo, kaanuman ket saanna a maaramid a lapeddan ti aniaman a proyekto wenno programa a pagnumaran idiay ilida kangrunaan kadagiti nakukurapay no la ket dumalan daytoy iti umno a proseso.
Sigun iti alkalde, inlimed kenkuana dagiti tauhan ti mammanday linteg iti inaramid a panagpapirma kadagiti dokumento para ti nadakamat a proyekto idiay ilida.
Mapilpilit met wenno maipagarup a naallilaw dagiti kapitan tapno agpirma gapu ta adda ti nakakuyog pay a “forms” ti PDP-Laban ken adda ti tatak a Miko-Migz.
Dagiti kapitan kinunana iti nasken nga agpili kadagiti marigrigat nga agbalin a benipesyaryo iti proyekto ken saan a ti benneg ti mammanday-linteg gapu ta mabalin nga agnumar dagiti saan a maiparbeng.
Silulukat met ti opisinana kinuna ni Valdriz para kenni Magsaysay tapno marisot ti nasao nga isyu.
Iti sabali a bangir, natuloy met laeng ti orientation program para iti TUPAD project idiay San Juan Gymnasium.
Iti sidong ti nasao a proyekto, agtrabaho iti 10 aldaw dagiti beneficiaries ken swelduan daytoy iti gobyerno iti P280 kada aldaw a panagtrabago dagitoy. (Absalom Flores)
