BR LA UNION – Agsubli idiay The Hague ni VP Sara Duterte iti sumaruno a bulan tapno bisitaen iti naka-detene nga ama na a ni sigud a President Rodrigo Duterte.
Kinuna ti Bise Presidente, tarigagay na a bisitaen ti ama na inton kasangay na (VP Sara) inton Mayo-31.
Plano na a makadwa iti kasangay na, iti ina na ken sigud nga asawa ti ama na a ni Elizabeth Zimmerman.
Segun kenni VP Sara, immunan nga ingkari na iti ina ken ama na nga agkakadwa da inton kasangay na.
Imbaga ni Sara a kayat na nga itugot ti ina na iti sumaruno a panagbisita na kenni Duterte, agsipudta napaay ti inana a makastrek iti detention facility ti sigud a presidente gaputi kurang a dokumento.
Istorya pay ni VP Sara, nga imbaga ti ama na idi bimmisita daytoy, nga ur-urayenna iti panang-saungkar kenkuana ni Zimmerman, isunga siniguro ti bise presidente a mapasamak dagiti ingkari na iti umadani a panagkasangay na.
Immuna a nagturong ni VP Sara idiay The Hague idi katengngaan ti Marso tapno suruten ken bisitaen iti sigud a presidente, kasaruno ti pannaka-arestar na ditoy Pilipinas ken pannakaiturong na idiay International Criminal Court.
