Tinungpal ni Vice President Sara Duterte ti panagdar-ay na ti preliminary investigation ti prosecutor-general a nakatuding iti maika-9 ti Mayo.
Simmangpet mismo ti maikadua a Presidente sadiay Department of Justice, ciudad ti Maynila tapno iprisenta ti bagbagi na iti piskalya.
Mainaig paylaeng daitoy ti sangsangwen na a reklamo nga ‘inciting to sedition’ ken ‘grave threats’ nga impila ti National Bureau of Investigation.
Ti reklamo ket nagtaud kadagiti panagpangta na kenni Presidente Ferdinand ‘Bongbong; Marcos Jr., First Lady Liza Araneta-Marcos, ken House Speaker Martin Romualdez.
Maipalagip nga idi napalabas a tawen ket bulgar nga inwaragawag ti bise presidente nga adda ti nirentaan nan a mangpatay kadagiti nadakamat a personalidad apaman adda mapasamak a madi kenkuana.
Kadwa ni Vice President Sara Duterte ti panagsango ti preliminary investigation ti legal team na a buklen da Attorney Paul Lim ken Attorney Michael Poa nu sadino ket pinasingkedan da ti pannakaisubmitir ti ‘counter affidavit’ kas sungbat kadagiti alegasyon.
Kabayatanna, inbinglay met ni Atty. Paul Lim a karaman iti nailanad ti counter-affidavit a saan a naan-anay a pannakaipila ti korte dagiti pammabasol agsipud ta kiniddaw ni Vice President Sara Duterte a maipabasura dagiti reklamo a sangsangwen na.
“Counter affidavit na naglalahad na nga ng mga kanyang mga dahilan kung bakit dapat hindi na ipagpatuloy at ibasura nalang ang mga paratang, mga reklamo ng NBI laban sa kanya,” kinuna ni Atty. Paul Lim, abogado ni Vice President Sara Duterte.
Ti sumaruno a preliminary investigation ti Prosecutor-General ket nakatuding inton Mayo 16, agdama a tawen.
