LA UNION – Saan pay nga ag-endorso ni Vice President Sara Duterte ti siasinuman nga agplan-plano a kumandidato para iti 2025 midterm elections.
Segun iti Bise Presidente, naka-focus ita iti panang-depensa iti Office of the Vice President nga iti agdama ket maat-atakar gapu ti maipagarop a saan nga umno a panangusar ti pondo ti ili.
Impaganetget na a maysa daytoy kadagiti pagrebbenganna kas Vice President.
Inaramid ni VP Sara iti waragawag iti maysa a press conference idi Miyerkules ken sinaggaysa a sinungbatan ti opisyal dagiti isyu a maibatbato kontra OVP iti tengnga ti panang-repaso iti gakat a pondo ti opisina para inton 2025.
Immuna a pinagkedkedan ni VP Sara a depensaan iti gakat a P2.037 billion a pondo ti OVP para iti sumaruno a tawen kadagiti panagdengngeg ti House committee ken saan met a dimmar-ay iti plenary deliberations.
Iti biang ni VP Sara, imbaga na nga italek na ti panagdesisyon ti maipaay a pondo para iti OVP, iti House of Representatives ken impaganetget na a dua laeng a mammanday linteg iti addaan ti maudi a pannarita iti panang-aprobar dagiti pondo, dagitoy ket isuda House Speaker Martin Romualdez ken Appropriations committee head Rep. Elizaldy Co.
Sentro ita iti OVP ken DepEd a sigud nga idaulwan ni VP Sara iti panagdengngeg ti House good government committee gapu iti maipagarop a biddut a panagusar ti pondo iti 2 nga ahensiya.
Kabayatanna, inwaragawag pay ni VP Sara Duterte a saanna pay nga ikon-konsidera ti agdama a maki-tandem iti sabali a pulitiko iti 2028 presidential election.
