BR LA UNION – Inallokoy ni Manila 6th District Rep. Benny Abante ni Vice President Sara Duterte a tumestigo idiay Kamara de Representantes ‘under oath’ wenno tumestigo a nakasapata.
Daytoy ket tapno masungbatan ti bise presidente iti amin nga alegasyon kontra kenkuana, agsipudta iti House Justice Committee iti umno a forum tapno kontraen dagiti nasao nga alegasyon.
Impaganetget ni Abante, saan a tarigagay ti komite nga i-convict iti bise presidente wenno ibaga nga isuna ket guilty, ngem ketdi tarigagay da maamwan ti kinapudno iti likod dagiti alegasyon a maibatbato kontra kenkuana.
Sinubliyanan ni Abante iti immuna a waragawag ni VP Sara a sungbatan na dagiti alegasyon iti ‘umno a forum.’
Buwelta ti mammanday linteg, daytoy iti gundaway ken umno a forum tapno sungbatan ni VP Sara dagiti alegasyon ken komprontaen dagiti mangak-akusar kenkuana a kas kenni ni Ramil Madriaga, a nagpabigbig a maipagarop a sigud a bagman na.
Siniguro ti mammanday linteg, a denggen da amin nga ibaga ni VP Sara ken ipaayan da ti gundaway nga ibaga amin a kayat da nga ibaga.
Kinuna na a mas makatulong daytoy tapno makapag-desisyon dagiti miyembro ti justice panel a mangdetermina nu adda probable cause dagiti reklamo.
