BR LA UNION – Impasigurado ti Kamara de Representantes a silulukat da iti panangawat kenni Bise Presidente Sara Duterte no agbaliw ti panunotna ken tumabuno iti maikapat nga State of the Nation Address (SONA) ni Presidente Ferdinand “Bongbong” R. Marcos Jr. inton Lunes, Hulyo 28.
Segun kenni House spokesperson Atty. Princess Abante a nupay nakaipatuloden ti opisina ni Duterte iti surat a mangibagbaga a saan a tumabuno, agtalinaed a silulukat ti Kamara kadagiti amin nga opisyal ti gobierno, pakairamanan ti Bise Presidente, ken impaganetgetna ti kinapateg a madengngeg iti tinawen a report ti Presidente iidiay Kongreso ken kadagiti umili a Pilipino.
Iti waragawag ni Abante ket kasaruno iti kumpirmasyon ni House Secretary General Reginald “Reggie” S. Velasco itay napan a lawas a nangipatulod ti Office of the Vice President (OVP) iti surat a mangibagbaga a saan a tumabuno ni VP Sara iti SONA, maibilang a maikadwa nga agsaruno a tawen.
Iti laksid daytoy, kinuna ni Velasco nga agtultuloy ti amin a panagsagana, pakairamanan ti pannakaipaay ti naituding a tugaw iti VIP gallery ken holding room para iti Bise Presidente ken dagiti staff-na nu bilang agbaliw ti panunotna.
Awan iti imbaga a rason ti Office of the Vice President a rason ti saan a panagatender ti Bise Presidente, ngem kinumpirma ni Velasco nga amin a dadduma pay a naawis nga opisyal ti gobierno ket pinasingkedan nga umatendar da.
Nakatuding iti maikapat a SONA ni Presidente Marcos inton Lunes, Hulyo 28, kabayatan ti joint session ti Senado ken House of Representatives iti plenary session hall ti Batasang Pambansa sadiay Quezon City kas maibasar iti Konstitusyon.
