Naiwarasen idiay Kalayaan Plaza, Barangay Central, Quezon City idi Biernes dagiti ‘Wanted’ posters ni dati a Presidential spokesperson Attorney Harry Roque.
Dagiti nadakamat a posters ket ti impaskil dagiti kameng ti agtutubo ti Akbayan Party ken inwarasda kadagiti umili, tricycle drivers ken vendors iti nasao a lugar.
Naikabil ti balikas a “WANTED, Harry Roque POGO lawyer” iti nasao a poster.
Kagiddan daytoy, inawagan ti grupo ni Roque nga agsurrender ken sanguen ti arrest order kontra kenkuana babaen ti House Quad Committee gapu iti panagkedkedna a mangisubmitir kadagiti dokumento a kiniddaw ti komite mainaig iti kellaat panagngato ti kinabaknangna,kasta met a nasken a mangisubmitir isuna ti SALN-na ken dadduma pay.
Kinuna ni Akbayan Youth secretary general Khylla Meneses a saan laeng a ti Kamara ti mangkamkamat kenkuana no di pay ket dagiti umili.
Nalawag ken silulukat ti maipagarup nga akem ken relasion ni Roque iti industria ti POGO.
Indagadag pay ti partido iti publiko a tulongan dagiti otoridad a mangbirok kenni Roque.
Maipalagip a daytoy laeng a lawas ket imbilin ni Philippine National Police (PNP) chief General Rommel Francisco Marbil ti pannakabukel dagiti tracker teams a mangiserbi iti arrest warrant kontra ken ni Roque.
