Inpakaammo ni Department of Interior and Local Government Secretary Jonvic Remulla nga adda idiay Paris ni sigud nga Ako Bicol Rep. Zaldy Co ken maipagarup nga agnanaed iti 10-bedroom mansion sadiay Champs-Élysées a mapattapatta nga aggatad ti $200 million wenno agarup ₱14.18 billion.
Segun kenni Remulla, asideg iti property iti maysa a Christian Dior store. Agtalek met iti gobierno a maisubli ni Co ditoy Pilipinas sakbay a malpas ti asylum application-na idiay France.
Sumangsango ni Co iti kaso a graft ken malversation mainaig iti maanomalya a ₱289.5 million flood control project idiay Oriental Mindoro.
Malagip a naidetine ni Co idiay Prague kalpasan a maharang iti beddeng ti Germany gapu iti problema ti travel documents.
Nupay kasta, kenuna ni Department of Justice Acting Secretary Fredderick Vida idi Abril 28 nga awanen daytoy iti kustodia ti Czech authorities, idinto a pinasingkedan ti Malacañang a nangidatag daytoy ti asylum application idiay France.
Kabayatanna, pinaglibakan ti abagona ni Co a ni Atty. Ruy Rondain iti alegasyon a nagtagikua iyi kliyentena ti mansion idiay Paris.###
