BR LA UNION – Nainget a pinaglibakan ni Ako Bicol Partylist Rep. Zaldy Co iti awan basaran nga akusasyon ni Navotas Rep. Toby Tiangco.
Kinuna ni Co a saan nga isuna ti mastermind iti maipagarop a last minute budget insertions ken realignments ti items iti 2025 General Appropriations Act.
Siniguro ni Co nga amin nga items iti 2025 GAA ket aprubado ti plenary sessions.
Ita nga aldaw ket naglosolos kas partylist congressman ni Co.
Inaramid ni Co iti anunsiyo iti bukod na nga official facebook page.
Iti mensahe ti kongresista, inwaragawag na a nadagsen iti rikna na ngem nagdesisyon nga aglosolos iti pagrebbengan na kas kongresista, para iti pagsayaatan ti pamilya na ken kadagiti tattao nga agtultuloy a pagserbianna.
Impaganetget ni Co a ti panawen a panagtakem na, imbaga na nga ingkagumaanna nga agbalin a napudno nga agserbi kadagiti umili, nangruna kadagiti taga-Bicol.
Nagyaman pay kadagiti amin a sumupsuporta kenkuana.
Naawat metten ti Office of the Speaker iti resignation letter ni Rep. Co ita nga aldaw agarop alas-2:35 ti malem.
Iti surat ni Rep. Co kenni Sepaker Bojie Dy III, imbaga na ti pangta iti biag ken ti pamilya na.
Makit-kita na a saan a maipaayan ti due process iti sangsangwenna ng alegasyon isunga nagdesisyon nga ag resign.
Nainget pay a pinaglibakan ni Co a nalawag nga ipakpakita da iti publiko ti nagarbo a panagbiag.
