Impasingked ni Agri Partylist Representative Wilbert Lee a makainsulto ken kalokwan ti panangusar kadagiti kasapulan unay a pondo para iti kanayonan a serbisio ti salun-at kadagiti narang-ay nga okasion wenno iturong dagitoy kadagiti proyekto a saan met a pakatayan dagiti Pilipino no saan a maaramid.
Daytoy ti mensahe ni Lee iti sango ti pannakaikkat ti subsidy ti gobierno iti PhilHealth iti sidong ti 2025 national budget.
Para kenni Lee, dakkel a basol no saan a maited ti pondo ken suporta a kabaelan met a maited, imbes ketdi ket maus-usar kadagiti sumagmamano laeng ti mabenepisyaran.
Kabayatanna, kiniddaw met ni Lee iti PhilHealth nga aramiden a new year’s resolution ita a 2025 ti ad-adda a mangpalawa dagiti health benefit packages para kadagiti Pilipino, nangruna ta adda met umdas a pondo ti ahensya a mangipatungpal iti daytoy.
