Natalged ken nakaawiden iti pagtaenganda ti 15-anyos a menor de edad, maysa nga estudyante, ken residente ti Barangay Bitalag, Bacnotan, La union nga immunan a naipadamag a mapukpukaw idi napalabas a bulan.
Maibasar iti report manipud ti Bacnotan Municipal Police Station, pormal nga inreport ti inana idi Pebrero 2, 2026 a mapukpukaw daytoy kalpasan a saan a nagawid ti mano nga aldaw.
Segun ti ama ti menor de edad a kaduana daytoy iti pagtaenganda idi kellaat a pimmanaw.
Impagarup ti pamilia ti menor de edad a mapan laeng agpa-dental procedure, ngem kalpasan ti sumagmamano a minuto ket pimmanaw a saan a nagpakada.
Innayon ti ama a naudi a nakita ti menor de edad a nakalugan iti motorsiklo a minaneho ti saan pay a nabigbig nga indibidual.
Iti interview nga insayangkat dagiti otoridad kalpasan ti panagsublina, naammuan a boluntario a pimmanaw ti menor de edad gapu iti parikut iti pamilia.
Awan ti naipadamag a pisikal a panangabuso wenno aniaman a krimen a naaramid kenkuana, ken iti agdama ket adda iti nasayaat a kasasaad.
Gapu iti daytoy a rason, impalagip dagiti otoridad iti publiko, kangrunaan kadagiti nagannak ken agtutubo iti kinapateg ti panangtaginayon iti silulukat a komunikasion iti uneg ti pamilia.
Napateg para kadagiti agtutubo nga adda ti pagpatulungan ken mangbalakad kadakuada kadagiti parikut a pagdaldalananda partikular iti nagannak, kabagian, wenno mapagtalkan a gagayyem ken saan ketdi nga agtalaw.
Imbalakad pay ti pulisya kadagiti nagannak a mangipaay ti umdas a panangaywan ken panangmanehar kadagiti annakda kangrunaan iti panagusar ti cellphone ken social media, tapno maliklikan dagiti kapada a pasamak a mabalin a makaipaay ti peggad iti kinatalged ken karadkad dagiti menor de edad.
Kabayatanna, impanamnama ti Philippine National Police (PNP) iti agtultuloy a napartak ken dagos a panagresponde kadagiti insidente ti missing persons, nangruna no adda dagiti menor de edad tapno masurutan ken masigurado ti kinatalgedda.###
