BR LA UNION – Agarup $2 bilyon a gatad ti lana ti nakatuding nga i-export ti Venezuela idiay Estados Unidos.
Daytoy ket kalpasan a nagtunos ti US ken Venezuela maipapan iti nasao nga isyu.
Ibilang ni US President Donald Trump ti nasao a katulagan kas maysa a flagship negotiation tapno ma-divert iti suplay ti lana manipud China bayat a kinunana a makatulong daytoy iti Venezuela tapno maliklikan iti nakar-karu pay a panagkissay ti produksiyon ti lana.
Naipadamag nga adda minilyon a bariles ti lana ti Venezuela kadagiti tanker ngem saan a maipatulod gapu iti export ban nga impaulog ni Trump sipud pay idi katengngaan ti Disyembre.
Ti nasao a blockade ket paset ti kumarkaro a panang-pressure ti US iti gobierno ni Venezuelan President Nicolas Maduro, a nagresulta iti pannakaarestona idi napan a lawas.
Iti maysa a post, kinuna ni Trump nga iturn-over ti Venezuela iti nagbaetan ti 30 million ken 50 million a bariles ti sanctioned oil iti US.
Kinunana a mailako ti lana iti presiona iti merkado, ket ti kuwarta a maurnong manipud iti daytoy ket kontrolen ti US President tapno masigurado a mausar daytoy para iti pagimbagan dagiti tattao ti Venezuela ken Estados Unidos.
Segun kenni Trump, ni US Energy Secretary Christ Wright ti mangimaton iti pannakaipatungpal ti katulagan ken ti lana ket maibiyahe babaen kadagiti barko a direkta kadagiti puerto wenno sanglada ti Amerika.
