LA UNION – Nagasat a naispal dagiti dua a beach goers manipud iti pannakalmes iti surfing area idiay Barangay Urbiztondo ili ti San Juan, La Union.
Nabigbig dagitoy a da Juan Miguel Dinopra, 15, ken ni Raymond Cabugao, 50, agpada a residente ti Mangaldan, Pangasinan.
Maibasar iti report a nakalap ti Bombo Radyo manipud iti San Juan Municipal Police Station, naamuan a ginandat nga isalakan ni Cabugao ni Dinopra ngem agpadada a naiguyod ti napigsa a dalluyon.
Dagus met nga immarayat dagiti rescuers iti dua isu a naisalakan dagitoy ken dagus a naitaray iti pribado a pagagasan iti siudad ti San Fernando.
Iti agdama ket natalgeden ti kasasaad dagiti dua a beach goers.
