BR LA UNION – Sinuspinde ti Philippine Military Academy (PMA) iti dua kadagiti uppat a kadete a mairam-raman iti maipagarop nga hazing incident, segun iti Armed Forces of the Philippines (AFP).
Segun kenni AFP spokesperson Col. Francel Margareth Padilla, maysa kadagiti uppat a kadete ket naabsuwelto, dua ti nasuspinde, ken maysa ti napatawan ti ”punishment” kas paset ti chain of command.
Maibasar iti imbestigasyon ti Baguio City Police, iti biktima ket maipagarop a nakapadas ti paulit-ulit a physical abuse ken humiliation manipud Setyembre 2 agingga 29, 2024.
Inawagan ti complainant ti napasaranna a panangabuso kas “animalistic tripping,” a pakaibilangan ti panangkugtar ken nalabes a physical training.
Gaputi dayta, naospital iti kadete kalpasan a napukawan ti puot gaputi sinagrap na a napigsa a danog ken na-discharge idi Hunyo 30, 2025.
Segun met iti PMA, saan a maibilang a hazing iti napasamak nga insidente maibasar iti Anti-Hazing Act agsipudta saan a paset daytoy ti initiation process, ngem ketdi panangirwar ti sakit ti nakem dagiti kaklase iti performance ti biktima.
Kabayatanna, ur-urayen iti PMA ti kopya ti pormal a reklamo ken report ti pulisya.
